Ungu.岩狗命理館

  04/18/2025 nancy kwai - 八字性格：身弱傷官，柔美與堅強之間的反差私心講，鍾意nancy kwai，趁住佢發布新EP嘅日子，講講佢八字。而且命理上，佢亦係一個講傷官嘅好例子，尤其係好多女性都關心嘅「傷官見官」。 根據wiki上面寫嘅生日，佢係癸水日元，地支辰寅卯三會木局。木局以寅月爲中心，甲木形式嘅傷官主導佢內心真實情況。 1. nancy kwai 第一個反差特點：甲vs乙，外柔內剛，外曲內直。因為2023開始嘅大運乙亥，令到地支嘅木局變為用乙木嘅形式來表現，偏向柔弱。改名「綽」，有飄逸綽約嘅意境。但畢竟乙木特質只係因為大運而出現，掩蓋唔到甲木剛直嘅一面。 2. 第二個反差特點：戊vs寅，外靜內動，外在「正經」，內在「古靈精怪」。月柱天干戊土坐係寅木上係「傷官見官」。戊土係穩定安靜，寅木係破土而出嘅意象。 呢兩個性格上嘅反差，有人好鍾意，我就係其中一個。亦有人唔鍾意，呢種「表裏不一」嘅感覺令到佢偏小眾。 下篇 續講佢 唔同時辰配合出來可能嘅格局&呢個大運有咩特別 圖片查看Thread https://www.threads.net/@ungu.9/post/DIgeG7ZxKk-

  04/10/2025 見到人地day trade賺幾倍十幾倍，毋需要妒忌，望下自己個八字先。 Day trade短炒嘅八字最緊要有殺有劫，最好兩者夠力兼平衡，偏財還是其次。反映喺性格嘅意思係意志+慾望強，同時競爭意識、自制力、轉數又配合到。 身旺但印重，如果玩Day Trade會唸得太多，轉身唔夠快，容易被套。但適合價值型中長線投資。 而食傷重嘅人，有殺制殺，有財生財，有創業思維，有主見，會發掘到其他人忽略嘅機會。佢地打嘅係先手，而Day Trade 打嘅係後手。 所以投資風格要適合自己嘅性格，唔了解自己性格，了解下八字都有幫助。 #八字性格 https://www.threads.net/@ungu.9/post/DIS04aixCd1

  04/04/2025 你嘅八字唔到你揀；日主以外，果七個「十神」關係，你冇得揀；行咩野嘅十年大運亦都係無得揀。但係八字格局，唔係硬繃繃，係人自己「活」出嚟！ 回帶番上篇文，格局係一種大腦迴路，一種習慣。係因為呢個組合好用+有條件去用=有趨勢形成呢種格局。 用例子來講，一個人佢本身有「傷官」有「財」，亦唔一定就係「傷官生財」格。可能佢活出嘅生命，唔需要成日將「傷官」同「財」做連結。譬如話，佢細個行咗20年官運，屋企嘅環境又管得嚴，令佢做咗一個短暫嘅「財官格」，做個乖乖仔。但唔好彩20歲幾轉行財運，八字大運啲官殺謝咗皮，最佳選項就係做返佢本身最明顯嘅「傷官生財」格。 「老正」同「蠱惑」，喺八字上冇話好定唔好，只有適唔適合嗰一個八字，同埋嚟緊要行嘅運嘅運。 假如一個人係要諗計度橋嚟緊嗰啲大運先會搵得多錢，但係個性格已經塑造成咗「老正」，好難要佢一時變成靈活彈性，變得嚟人生呢段黃金時期都可能已經冇着大半。 下篇續 #八字 https://www.threads.net/@ungu.9/post/DICPRKvSRF_

  03/27/2025 八字格局其實可以科學啲咁理解係人嘅大腦迴路。日復一日，你會發現人生註定面對著一啲重複嘅課題，另外又發現你與生俱來有一種資源用起來得心應手，在加上你自身嘅五行，三種力量就形成穩定結構。你重複咁用你嘅資源，解決你嘅課題，產生正向嘅反饋，久而久之，形成嘅大腦迴路，就塑造左你嘅性格，亦即係你嘅八字格局。 譬如講，唔同人應對「七殺」（外在環境/事業比緊你嘅壓力），有啲人嘅格局係「殺印相生」，佢係用休息同進修去應對；有啲人嘅格局係「傷官制殺」，佢係用思維創意或者去創業；有啲人嘅格局係「食神制殺」，係靠玩樂舒壓。 至於「傷官見官」，我就唔認為係一種格局。佢只係講左一個問題出來，傷官和官交戰而產生重複不斷嘅自我矛盾，而無指出解決問題嘅方法。呢種就只能夠算係命主嘅特質，無正向反饋嘅思考迴路 ，唔可以算係格局。 #八字改命   https://www.threads.net/@ungu.9/post/DHpvPUyRonQ?xmt=AQGzcGMS1c5bFmhjenPUrc8xMowKm1KfWMxy-Gl95FKuSXA

03/21/2025 搵我睇八字，我會首先核實你嘅時辰： 1. 我會對照你嘅出生地，換算真太陽時； 2. 我係計子初換日，唔會分早子晚子。 呢兩種計時辰嘅方式，先符合古人八字計時辰嘅方法。 關於早子晚子嘅爭議，以下係我嘅觀點歡迎討論： 中國古代嘅計時觀念，同現代人唔同。 佢哋睇時刻係一段一段嘅範疇，現代人睇時刻係一個精準嘅點。 古人計時係由大到小細分，大餅分細餅；現代人計時係由小到大累積，例如60秒進位1分鐘⋯ 方便解釋，先用午時做例子 古代人講午時，係包括成個11:00 到13:00。要細分，再講幾多刻。 而現代人講十二點就係12:00，12:05就係遲到5分鐘。 午時，係日中正負60分鐘。踏入11點就係日中嘅「範疇」。假如用「氣」嘅概念來講，正午最純嘅氣，前後發散60分鐘，11am開始就有正午嘅「氣」。 明白呢個邏輯，講番子時。 古人唔係唔明白子中（12am）係天文上換日嘅精準時刻。而係踏入11pm，就係踏入換日嘅「範疇」。亦即係話，有下一日嘅「氣」。 其實就算係今時今日，要慶祝農曆嘅節日，例如冬至、新年，拜神都係11pm開始做。對神明都係計子初，我哋區區凡人嘅生日，又點解會唔一樣？ #八字理論 https://www.threads.net/@ungu.9/post/DHdIbpExshU?xmt=AQGzcGMS1c5bFmhjenPUrc8xMowKm1KfWMxy-Gl95FKuSXA