八字命理 之 比喻篇 (一）

 其實八字點樣係好命？我覺得用簡單啲嘅講法就係：呢條命穩唔穩陣？

如果我用一張凳來比喻八字, 呢張凳點樣整先穩陣？ 張凳=你個八字， 大運流年=可以推郁張凳嘅外力。一般人可能認為五行俱全就好, 但其實大部份五行俱全嘅命都唔會係一啲好出眾嘅命，除非係極少數嘅例外。點解咁講？你幾時見過一張五隻腳嘅凳係好穩陣，唔會趷吓趷吓？講番易理，五行之中，梗有一個係你嘅忌神。若本命五行皆全，即係最少有一個忌神。然後大運流年加強了忌神力量，咁就有可能出問題。差啲嘅情況﹕地支三合局或三會局加強忌神嘅時候特別明顯。最差情況﹕上一年三會或三合加強喜用神，下一年另一款三會或三合加強忌神。一條命慢慢變差，還算可以承受，但由好好突然轉勁差，就好易出意外。就好似張凳有隻腳都脆脆地，上一下用盡力𢭃起，下一下用盡力鋤落去，呢隻腳咪易斷囉。另一個極端，八字入邊全部係同一個五行，咁又企唔企得穩呢？ 梗係穩啦，呢啲係可以修練成仙嘅八字。雖然佢得一隻腳，但係隻腳粗到我哋唔可以話佢係腳，呢種凳就係嗰種成隻實心圓柱形嗰種凳。除咗行官殺運，都冇問題。官殺點解唔好？係因為本身自己嘅五行太強，官殺過嚟管唔到自己，反而俾自己五行反剋。所以，專旺八字行官殺，易有官非，打工難晉升，剋上司，女命影響婚姻，剋夫。  

Translate